Larunbat eta igandean izan zen Gardeako I. Padel misto txapelketa. 20 bikotek hartu zuten parte, eta 43 partida egon ziren egun eta erdian. Eguraldia lagun, giro ederra izan zen nagusi kirolgunean.
Lau multzotan banatu zituzten 20 bikoteak, eta talde bakoitzeko garaileek eskuratu zuten finalerdietarako txartela. Finalera iritsi ziren bi bikoteak ondorengoak izan ziren: Nerea Garmilla eta Jon Garmilla luiandoarrak, eta Janire Fernandez eta Alex Zaton laudioarrak. Aiararrentzat izan zen garaipena, eta bigarren postuarekin etxeratu ziren laudioarrak.
"Laudioko padel giroa oso sanoa da, jendeak asko erraztu du guztia. Espero dugu Gardeako lehen torneo hau urte luzeetako lehenbizikoa izatea"
"Oso balorazio positiboa egiten dugu. Partaide eta zaleen artean sekulako giroa sortu da, eta klimatologiak asteburu osoan lagundu du", adierazi du Aitor Pereda antolatzaileak. Jendearen jarrera eta harrera azpimarratu ditu, kirol mailarekin batera: "Partida lehiatuak izan dira, oso politak. Oso pozik gaude, jendearen feedbacka oso ona izan da, oso eskertuak gaude jendearen jarreragatik: puntualak izan dira, oso giro ona egon da, beti egon dira laguntzeko prest. Bagenekien Laudioko padel giroa oso sanoa zela, onerako eta asko harritu gaitu: jendeak asko erraztu du guztia".
Sergio Perez aritu da Peredarekin batera txapelketa prestatzen: "Guk ere asko gozatu dugu egun horietan, partida gehiago jokatzeko kontaktuak egin ditugu, eta padela sustatzea lortu dugu; baina, batez ere, familia kirola. Parte hartu dugun askok senideak bueltaka izan ditugu hor: umeek euren gurasoak kirola egiten ikusi dituzte, eta imitatzeko joeragatik, horrek jarduera fisikoetara erakartzea eragin lezake". Familia eta lagun giroa izan dira nagusi, beraz, Gardean asteburuan. Hargatik, aurrera begira, irrikaz mintzo dira Aitor Pereda eta Sergio Perez antolatzaileak: "Espero dugu Gardeako lehen torneo hau, urte luzeetako lehenbizikoa izatea".
Gardeako jaien baitan antolatu dute lehenbizikoz padel ekimena, eta harrera ona izan du: egun osoan zehar makina bat jende gerturatu zen norgehiagokak ikustera eta jolastera. Ildo beretik, kirol ugariren lekuko izan da asteburuan Gardea: Ruperto Urkijo bola elkarteak txapelketa antolatu zuen, eta hockey zein tenis entrenamendu irekiak ere izan ziren zelaigune horietan.
Argazkiak: Padel Laudio eta Aiaraldea.eus