Señora sariketaren bigarren saioa ospatu zen atzo Faktorian. Auzolanean eta elkarlanean antolatu dute ekimena bigarrenez, Euskal Herriko zenbait bertsolari, gai-jartzaile eta zale emakumeek. 18:00etan zegoen jarrita hitzordua, eta handik gutxira ekin zioten emanaldiari Leire Vargas Nietok, Irati Anda Villanuevak, Andere Arriolabengoa Bengoak, Ane Beloki Lopezek, Ane Labaka Maiozek eta Sarai Robles Vitasek, Amaia Agirre Astondoa gai-jartzailearen gidaritzapean. Hain zuzen, azken biek irabazi zuten kanporaketa, eta ondorioz, ekainaren 4ean Leitzan izango den finalean abestuko dute Aner Euskitze eta Amaia Iturriotz Etxanizekin batera.
Laudioko lanporaketan Sarai Robles Vitas eta Ane Labaka Mayozek eskuratu dute II. #SeñoraSariketa-ko finalerako txartela. @EkintzaFaktoria pic.twitter.com/7YXhme4HDd
— II. Señora Sariketa (@senorasariketa) May 21, 2022
Giro beroa nagusitu zen hasieratik amaierara. Lehenbiziko bertsoak Julen Eizgarrek eta Ainhoa Comasek abestu zituzten, Señora Sariketarako prestatutako kopla sorta medio. Hala, atzoko 6 señorek txaloka eta irrika jarri zituzten bertaratutako entzuleak. Ariketa ugari osatu behar izan zituzten, gainera: binaka, bakarka zein taldean aritu ziren kantuan ertzeko begiradetatik identitate eta gogoeta ezberdinei ahotsa eta gorputza jarriz.
Lehenbiziko bertsoak Julen Eizagirrek eta Ainhoa Comasek abestu zituzten, Señora Sariketarako prestatutako kopla sorta medio
Hendaian izan zen lehenbiziko kanporaketa maiatzaren 14an, eta Faktoriako saioak hartu zion atzo lekukoa. Hurrengo geltokia Leitza izango da, bertan jokatuko baita finala. Aurreratu dutenez, egun osoko egitaraua prestatuko dute. Ohi gisa, sare sozialetan (Instagram eta Twitterren) plazaratuko dituzte sariketari dagozkien xehetasun guztiak.
Aiaraldea Komunikabideak eta Faktoriako Bor-bor feminismo ildoak lagundu zuten, besteak beste, atzoko emanaldiari bultzada ematen. Faktoriako bertso saioa datorren astean egongo da ikusgai Aiaraldea.eus atarian.