Zinemaldian ikusi ahalko da Esti Urresolaren 'Cuerdas' filma
Erredakzioa
2022ko uzt. 18a, 10:10
Zabaltegi Tabakalera sailean proiektatuko dute zinemagile laudioarraren lana.
Ibilbide oparoa egin du Esti Urresolaren Cuerdas filma laburrak orain arte. Rails d'Or saria jaso zuen Canneseko jaialdian, eta Kimuak katalogoan sartu zuten handik gutxira.
Orain, aldiz, Zinemaldirako hautatu dute 30 minutuko ikus-entzunezkoa. Zabaltegi Tabakalera sailean proiektatuko dute lana. Momentuz lau filma labur hautatu dituzte bertan lehiatzeko, baina gehiago sartzea aurreikusi dute antolatzaileek.
Zinemaldiaren 70. edizioa izango da aurtengoa, eta irailaren 16tik 24ra bitartean egingo da.
Esti Urresola "oso pozik" azaldu da albistearekin, era aukera baliatu du pelikularen ekoizpenean parte hartu zuten pertsona guztiei eskerrak emateko.
Dena den, Aiaraldeko zinemagileak ez du Cuerdas lanaren ibilbidea ospatzeko tarte askorik izango, bere fikziozko lehen filma luzearen grabaketan murgilduta baitago uneotan. 20.000 especies de abejas da pelikula horren izena, eta eskualdean grabatzen ari dira eszena gehienak, Ermualden edota Amurrioko igerilekuetan, besteak beste.
Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.
Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.
Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.
Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.
Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.
