Bi mobilizazio deitu ditu gaurko Mugimendu Feministak, Laudion eta Amurrion bart jazotako erasoei erantzuteko

Gaur 18:00etan izango da erasoak salatzeko elkarretaratzea Alberto Acero plazan. / Aiaraldea.eus

Bart gauean eraso bana salatu dira Laudion eta Amurrion. Mugimendu Feministak mobilizazioak deitu ditu bi herri horietan gaurko. Laudiokoa 18:00etan izango da Alberto Acero plazan, eta Amurriokoa 19:00etan Juan Urrutia enparantzan. Mugimendu Feministak erantsi duenez, ez dira jazotako eraso bakarrak izan.

Laudioko Mugimendu Feministak salatu duenez, zenbait eraso egon ziren atzo gauean herriko kale eta tabernetan. 24 orduz erasoak salatzeko sare eta ekimena jarri dute abian abuztuaren 15etik 17ra, eta 24tik 28ra (625 444 105 telefono zenbakiaren bidez).

Elkarretaratzea deitu du Laudioko Mugimendu Feministak bart goizaldean gertatutako erasoak salatzeko gaur 18:00etan. Amurrion, berriz, 19:00etan izango da beste eraso bat salatzeko mobilizazioa

Sare sozialetan adierazi dutenez, mobilizazioa deitu dute gaurko. Hain zuzen, 18:00etan izango da elkarretaratzea, Alberto Acero plazan.

Aiaraldea Komunikabideak baieztatu duenez, taberna bat baino gehiagotan errepikatu da erasoa. Ertzaintzaren esanetan, gizonezko bat identifikatu zuten atzo exhibizionismoa leporatuta, eta isun administratiboa jarri diote. Alabaina, ez da auzibiderik aplikatuko, adingaberik tartean ez bada ez delako gehiagorik egiten, Ertzaintzak jakinarazi duenez.

Laudioko Mugimendu Feministak ez dela eraso bakarra izan nabarmendu du, eta mobilizaziora batzeko deia luzatu die herritar eta eragile orori. 

Amurrion ere, beste eraso salaketa bat

Laudiokoa, ordea, ez da jazotako kasu bakarra izan. Amurrioko Mugimendu Feministak mobilizazioa deitu du gaur 19:00etan. "Amurrion atzo gauean beste eraso matxista bat gertatu zen. Ez da jaietan eman den eraso bakarra izan. Ez dugu eraso bakar bat ere onartuko! Emakumeok* autodefentsa feministaz armatuta gaude! Erasorik ez erantzunik gabe!", salatu dute sare sozialetan. 

Hori dela eta, elkarretaratzea egingo dute gaur 19:00etan Amurrioko Juan Urrutia plazan.

Amurrio eta Laudioko Udalek, bat mobilizazioekin

Tokiko erakundeek iragarri dute batuko direla Mugimendu Feministak deitutako mobilizazioetara. Laudioko Udalak zabaldu du: "Laudioko Udalak bat egin du gaur arratsaldean, 18:00etan, bart izandako eraso sexista gaitzesteko Laudioko Mugimendu Feministak deituta Alberto Acero plazan egingo den elkarretaratzearekin. Laudioko Udalak ez du inolako eraso motarik onartuko".

Amurrioko Udalak, aldiz, erakunde adierazpena egin du bere atxikimendua emanda mobilizazioari:

"Azpimarratu nahi dugu indarkeria matxista Giza Eskubideen urraketa larria dela eta lehen mailako gizartearazoa; indarkeria pairatzen duten eta hari aurre egiten dioten emakumeen eta LGTBI pertsonen duintasunari eta segurtasun fisikoari eta moralari erasotzen dio.
Indarkeria horiek ez dira ekintza bakanak, baizik eta portaera esplizituen, normalizatutako eta sinbolizatutako mezuen arteko sarea dira. Sare horrek gure gizartea egituratzen du eta horren azken helburua da gizonek emakumeak euren mende izaten jarraitzea eta indarreko sistema heteropatriarkalak markatutako mugak gainditzen dituzten gorputz, eredu edo jarrerarik ez egotea.

Ildo horretan, Amurrioko Udalak, erakunde publiko erantzule gisa, bermatu egin behar du emakumeen eta LGTBI pertsonen Giza Eskubideak eraginkortasunez betetzen direla; hortaz, neurriak sustatzen jarraituko du erakunde publikoek eta herritarrek oro har edozein eraso matxistari berehala eta irmotasunez erantzuteko, biktima lehentasunez artatzeko, prebentziozko jarduerak garatzeko emakumeek eta LGTBI pertsonek indarkeriari aurre egiteko tresnak izan ditzaten, eta erasotzaileen gizarteinpunitatea ez ahalbidetzeko.

Gainera, Udalak konpromisoa hartu du bere eskumenak erabiliz laguntzen eta lanean jarraitzeko, indarkeria matxistarik gabeko bizitza askeak bermatze aldera.

Horregatik guztiagatik, Udalak jakinarazi nahi du erakundeen ordezkaritzak bat datorrela Amurrioko Mugimendu Feministak deitutako deialdiarekin erasoaren gaitzespena adierazteko. Horretarako, 5 minutuko elkarretaratzea egingo da gaur, abuztuak 17, 19:00etan Udaleko plazan". 

Erlazionatuak

“Guztiok dugu espazio seguru eta erasorik gabekoak sortzeko erantzukizuna”

Laudio

Bi ekimen nagusi bultzatuko ditu Laudioko Mugimendu Feministak herriko jaietan: 24 orduz eraso matxistak salatzeko telefonoa eta manifestazioa.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide