URA Agentzia, Ertzaintza eta Laudioko udaltzainak bertaratu ziren atzo eguerdian San Joan errekara. Izan ere, auzokide batek 112 telefono zenbakira deitu zuen jakinarazteko bi isurketa zeudela eta animali anitz hil zituztela.
Udaltzaingoa 13:00ak baino lehen agertu zen, eta bigarren dei baten ostean, URA Agentziako teknikari bi eta Ertzaintza ere egon ziren inguruak arakatzen.
Salatzaileak Aiaraldea Komunikabideari azaldu dionez, isurketa puntu bat Landaluze 27. zenbakitik gertu dago, "baina gorago. Han kutxatila edo estolda batek gainezka egin zuen eta ur beltzez kutsatu du erreka". Usain gogorra utzi ez ezik, uraren kolorea ere aldatu du eta arrain hilak topa daitezke ubidea jarraiki.
.
Herritarrak berak erakutsi dio teknikari bati sorburua, eta profesionalak aipatu du kutxatila gainezka edota buxatuta egon daitekeela. Hala ere, ez du baztertu norbaitek ur beltzak bere putzutik hara bideratzera. Dena den, atzo Urbidek kutxatila orokorrean garbiketa egin zuen eta gaur enpresa pribatu bidali du azpiegitura hori garbitzeko. Partzuergoko langile batek aipatu dio Aiaraldea Komunikabideari kutxatila buxatu zela eta egiten ari diren lanekin espero dutela bolada batean ez gertatzea berriro.
Beste isurketa puntua Landaluze 19. zenbakian dagoen ataria baino lehen kokatzen da. Herritarrak argitu duenez, isurketa hori etengabe egon da kutsatzen azken hilabeteetan, gutxienez. Berez, karramarro hilak daude inguruan eta azpian eta arrainik ez dago uretan.
Arabako Foru Aldundiko Ingurumen Zerbitzua ere gertakariaren jakitun da.
Landaluzeko beste auzokide batek adierazi du herenegun katu bat ere hilik agertu zela kutsatutako tarte horretan, printzipioz, indarkeria seinalerik gabe. Hori bai, ez du zehaztu isurketekin harremana zuenik.
Gogoratu beharra dago orain San Joan erreka zabaltzeko obrak egiten ari dela URA Agentzia, uholdeen arriskuak murrizteko. 900.000 euro baino gehiagoko inbertsioa da hori.