22:30ean izan zen atzo Laudioko Mugimendu Feministak deitutako mobilizazioa. "Berriz ere hemen gaude, aurtengo udan eta jaietan argi ikusi dugu ezinbestekoa dela kaleak hartzen jarraitzea: Laudion lehen txanpan salatu ziren eraso anitzak", azpimarratu zuten. Euskal Herrian (Bilbon zein Algortan) azken asteetan izandako eraso eta gertakariak ere aipatu zituzten.
"Gu zapaltzen gaituzten erasotzaileek gure espazioak okupatzen jarraitzen dute, inoiz baino oldartuago daude. Ez dugu inolako erasorik onartuko, antolatuta gaude eta ez gaituzue geldituko, elkar zaintzen jarraituko dugu!"
"Gu zapaltzen gaituzten erasotzaileek gure espazioak okupatzen jarraitzen dute, inoiz baino oldartuago daude", erantsi zuten, "baina ez dira inoiz baino eraso gehiago ematen ari: eraso gehiago salatzen ari dira". Zentzu horretan, autodefentsa feminista eta antolatzeko beharra nabarmendu zuten: "Ez dugu aurrera egiteko zalantzarik, ez dugu atzera pauso bat ere emango".
Aurrera begira, saretzen eta antolatzen jarraitzeko asmoa berretsi zuen Laudioko Mugimendu Feministak: "Ez dugu baimenik eskatu behar, Euskal Herria feminista errealitatea da jada. Espazio askeak sortu eta espazioak gure egin ditugu, gozatzeko espazioak sortu ditugu". Dena den, mezu argia zabaldu zuten: "Eta ez ahaztu, erasotzaileen konplizeak ere erasotzaile zarete eta gure baimenik eta iritzirik gabe jarduten duzuen guzti horiek ere soberan zaudete. Ez dugu polizia zein printzipe salbatzailerik behar. Ez dugu inolako erasorik onartuko, antolatuta gaude eta ez gaituzue geldituko, elkar zaintzen jarraituko dugu! Kaleak, jaiak eta gauak gureak dira, eta gozatzera gatoz!".
Laudioko Mugimendu Feministak erasoak salatzeko 24 orduko telefono eta sarea jarri du martxan Laudioko jaietan (625444105). Abuztuaren 16an festen testuinguruan egondako erasoak salatu zituzten.