Espainiako Gazte Selekzio Txapelketako brontzezko domina erdietsi du Urko Ruiz Larizgoitia hockey jokalari laudioarrak Euskadiko Selekzioarekin, 18 urtetik beherakoen kategorian. Urriaren 29tik azaroaren 1era bitartean izan da lehiaketa, Madrilen.
Guztira, lau gol sartu ditu Ruizek jokatutako bost partidetan, selekzioko 'pitxitxien' taularen buru bilakatuz. Asturiasen eta Madrilen aurkako multzoko partidetan, txapeldun izan den Kataluniako taldearen aurkako finalerdian eta Andaluziaren aurkako hirugarren eta laugarren posturako partidan markatu zituen golak kirolari gazteak. “Lehenengo aldia da selekzioko pitxitxi naizela. Beste jokalari batek eta biok lau gol egin ditugu eta ilusio handia egin dit hori lortzeak”, adierazi du.
Lorpenaren inguruko balorazio positiboa egin du laudioarrak: “Oso ondo jaso dugu emaitza. Baneramatzan bi urte Euskadiko Selekzioarekin batera txapelketa honetan parte hartzen eta aurten 3. postuan gelditzeak poza sortu digu guztioi”.
Ez da Laudioko kirolariak Euskadiko Selekzioarekin batera txapelketa honetan parte hartzen duen lehen aldia. Izan ere, 16 urtez azpiko kategorian birritan parte hartu du, 2018/2019 eta 2020/2021 denboraldietan bosgarren eta seigarren sailkatuz, hurrenez hurren.
Datorren denboraldiari begira, laudioarrak azaldu du ez dela berriro lehiatuko txapelketa horretan Euskal Selekzioarekin batera, ez baitago kirolari nagusiagoentzako kategoriarik, gazteen mailan amaitzen baita. “Gustatuko litzaidake maila bat gehiago egotea”, aitortu du.