Laudio Glass Hubek 2,6 milioi euro jasoko ditu Eusko Jaurlaritzako aurrekontuetatik, deskarbonizazioa sustatzeko

Ander Añibarro Laudioko alkatea, Oskar Argote Vidralako erosketa arduraduna, Josu Basauri Trabeirako gerentea eta Oskar Acedo Ecovidrioko gerentea 2022ko beiraren egunean.

Ekonomiaren Garapen, Jasangarritasun eta Ingurumen Sailak 2,1 milioi euro emango dizkio Laudio Glass Hub proiektuari “deskarbonizazio-ekintzak sustatzeko”. Arabako Foru Aldundiak beste milioi erdirekin lagunduko du.

Azaroaren 2an aurkeztu zuen Ekonomiaren Garapen, Jasangarritasun eta Ingurumen Sailak 2023rako aurrekontu proiektua. 849,8 milioi euro aurreikusi ditu, aurten baino 73 milioi gehiagorekin.

Horietatik 2.183.440 euro izango dira Laudio Glass Hubentzako, “beiraren sektorean deskarbonizazio-ekintzak sustatzeko”. Iazko uztailean aurkeztu zuen Laudioko Udalak Laudio Glass Hub proiektua, "Europako beiraren erreferente" bihurtzeko asmoarekin. Gainera, Arabako Foru Aldundiak milioi erdi bat gehiago emango dizkio proiektuari.

Diru horrekin elektrolizagailu bat instalatu nahi dute, erreakzio kimikoaren bidez hidrogenoa sortzen duena. Izan ere, Laudioko beiraren industria da gas naturala modu estentsiboan kontsumitzen duen sektoreetako bat, eta deskarbonizazioa da, hain zuzen, Aiaraldea eskualderako Berehala Jarduteko Planaren ardatz nagusietako bat.

Aurrekontuen aurkezpen agerraldian, Ekonomiaren Garapen, Jasangarritasun eta Ingurumeneko sailburu Arantxa Tapiak jakinarazi zuen Aiarako industriarako "hidrogenoa sortzeko eta kontsumitzeko azpiegitura bat" sortzea aztertzen ari direla, elektrolizagailu bat ezartzearekin batera.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide