Esleitu gabe geratu dira Ellakuriko igerilekuen irisgarritasuna hobetzeko obrak. 44.578,76 euroko eskaintza ekonomikoa egin zuen Udalak, baina ez da enpresarik aurkeztu lehiaketara.
Gauzak hala, deialdi berria prestatu beharko du tokiko erakundeak eta, seguraski, eskaintza ekonomiko handiagoa egin. Hori egin behar izan zuen, adibidez, Antzokiko proiektua esleitu gabe geratu zenean. Milioi bat eurotan handitu behar izan zuen hasierako eskaintza eta, hala eta guztiz ere, enpresa bakarra aurkeztu zen bigarren deialdira. Fenomeno orokortu da hori, materialen eskasiak eta prezioen gorakadak sortutakoa.
18 urteren osteko aldaketa
Kirol azpiegiturako eraikinetako sarbideen irisgarritasuna hobetzea da Udalak Ellakurin egin nahi dituen lanen xedea, 'udako igerilekuen' irisgarritasuna hobetzeko.
Ellakuriko igerilekuak 1978. urtean eraiki ziren. 2006an azpiegituren birmoldaketa egin zen, eta beste hiru eraikin atondu zituzten. Orduan eraiki zituzten egurrezko pasabideak. Baina sarbide horien egoera okertuz joan da ordutik hona, baldintza klimatikoen ondorioz.
Bi fase
Dena den, Udalak lehiaketara atera zuena egitasmoaren lehen fasea baino ez da. Bigarren fasea gauzatzea aurreikusten dute aurrerago, pasabidea luzatzeko. Eraikin zaharrarenaren sarbidea da lehen fasean berritu nahi zutena.
Plano honetan ikusi daiteke urdinez lehen zatia, eta gorriz, bigarren fasean egingo litzatekeena: