Ekimenak egin ditu gaur Podemos Ahal Duguk EAEko hainbat udalerritan, bere 9. urteurrena ospatzeko. Laudion Aldai plazan bildu dira alderdiko hainbat militante. Bi albiste plazaratu dituzte bertan. Alde batetik, jakinarazi dute Podemos Ahal Duguren “Aiaraldeko zirkulua” eratu berri dutela, maiatzeko udal eta foro hauteskundeetara begira. “Duela urte batzuk Laudion Zirkulu bat eratu zen, baina desaktibatu egin zen gero. Gauzak hala, eskualde mailan aktibatu dugu orain”, azaldu du Leticia Jimenez Lozak.
Bera izango da Batzar Naguzietako hautagaia Aiaraldetik. Josep Moya Albarracin, aldiz, bigarren postuan joango da zerrendan, eta Socorro Rincon Chinchilla, aldiz, hirugarrena izango da.
Hirurak egon dira gaur goizeko ekitaldian:
Udal hauteskundeetara aurkeztuko diren, ebazteke
Udal hauteskundeen inguruan galdetuta, Jimenezek jakinarazi du beranduago jakinaraziko dutela horietara ere aurkeztuko diren edo ez. Momentuz, Batzar Nagusietako hautagaitzan jarri nahi dute indarra.
Hiru aldarri nagusi eraman nahi ditu alderdi moreak Arabako Foru Aldundira:
- Tokiko merkataritza eta negozioak bultzatzeko plan integrala garatzea.
- Kalitatezko osasun arreta bermatzea: “Langile gehiago, itxaronaldiak eta lan-karga murrizteko, Eusko Jaurlaritzarekin lankidetzan”.
- Alokairu eskuragarriak bermatzea udalerriko familia guztientzat, “gazteak eta adinekoak barne”.