ELAko Sail Sindikalak oharra zabaldu du Eusko Jaurlaritzako Lan Sailburuordearekin eta Lan Ikuskaritzarekin izandako bileren nondik norakoak azaltzeko.
Ordezkari sindikalen aburuz, ez da aparteko nobedaderik egon batzar horietan. Lan sailburuordeak berak eskatu zien bilera Glavistako langileei. “Lehen eskutik ezagutu nahi zuen enpresaren benetako egoera”, azaldu dute ELAko kideek, “guk dugun informazio guztia -gutxi- helarazi genion eta gure ibilbide osoa kontatu genion, Guardianek marrazo suitzarretara bota gintuenetik gaur egun arte”. Lan Saila “laguntzeko prest” azaldu zen bileran, “baina aitortu zuen ezin duela ia ezer egin, gurea ez delako lan-gatazka bat zentzu hertsian esanda”.
Lan Ikuskaritzara, aldiz, Parter Capitalen aurkako salaketa bat eraman zuten beharginen ordezkariek, Glavistaren jabeak langileen informazio eskubidea urratu duela iritzita. “Egoera hori helarazi genion ikuskaritzari eta erantzun ziguten urraketa horien arabera jokatuko duela”.
ELAren aburuz, bi bilera horiek balio izan dute erakundeei enpresaren egoeraren berri emateko. “Ikusteke dago zer emaitza izango duten, baina guk ez dugu gure egoera behar den toki orora eramateari utziko. Behar diren tekla guztiak sakatuko ditugu irtebide bat bilatzeko guk sortu ez dugun arazo honi”.
Horri lotuta, ordezkari sindikalek aurreratu dute bilera eskatuko diotela Laudioko lantegiko zuzendaritzari, hartzekodunen aurrelehiaketari eta enpresaren balizko salmentari buruzko informazio gaurkotua jasotzeko, “baldin eta badago”.
Bukatzeko, ELAko Sail Sindikalak bihar Laudion egingo den mobilizaziora bertaratzeko deia luzatu die langileei, eta laneko arroparekin jantzita joatea proposatu die.
