Autoglas-Glavista enpresako langileek ezjakintasunaren erdian jarraitzen dute, konpainiaren etorkizunari dagokionez, baina ez diote uko egin mobilizatzeari. Izan ere, gaur eguerdian Aldai plazan egon dira ordu eta erdiz eta bihar ere 13:00etan batuko dira lantegiko sarreran.
Langileen ordezkari batek azaldu dio Aiaraldea Komunikabideari azken egunetan ez dela egon berririk: "Azarotik lantegia geldirik dago eta duela bi aste elektrizitaterik gabe, Parter Capitalek ez baitu ordaindu hornidura zerbitzua. Hurrengo astean berriro bilduko gara zuzendaritzarekin, baina ez da ezer berririk jazo azken astean. Hau da, badakigu beiraren sektoreko enpresa bat interesatuta dagoela konpainiaren erosketan, baina ez da ezer aurreratu".
Autoglas-Glavista hartzekodunen aurrelehiaketan dago eta hori dela medio, 250 langile ingururen etorkizuna zalantzan dago. Beharginek hainbat mobilizazio egin dituzte jadanik eta bide horretatik jarraituko dute, Guardian -aurreko jabea eta hartzekodun nagusia- eta erakundeak sakatzeko eta herritarren babesa lortzeko.