Pasa den astean Eusko Jaurlaritzako Hezkuntza Sailako teknikari batek telefono deiaz jakinarazi zion Aretako Ikastetxeari erakundearen asmoa dela bi urteko umeen gela ixtea. Hori argudiatzeko, antza, adierazi zuten Aretan adin hori duten bost umeetatik soilik bik erabiliko dutela.
Zerbitzu publikorik gabe geratzeko arriskuan dauden bi familiak, guraso izan berri diren sendiak eta haurdun daudenak ere, berehala jarri dira harremanetan Aretako Guraso Elkartearekin eta hauek, aldi berean, erabakiaren kontra mugitzen hasi dira.
Guraso Elkarteak uste du gela horren itxiera dela lehenengo urratsa ikastetxea bera ixteko.
Izan ere, gurasoen iritzia da hori dela lehenengo urratsa ikastetxea behin betiko ixteko eta horrek eragina izango luke herri izaeran, "Fabian Legorburu baita Aretako harremanen, izaeraren eta eragile sozialen sorburuetako bat". Bide batez, elkarteak gogoratu du bi urte barru 100 urte beteko duela ikastetxeak eta Aretako herritarrentzako azpiegitura eta zerbitzua izanik, beti izan duela ikasle kopuru txikia.
Aldi berean, azpimarratu dute Eusko Jaurlaritzak ulertu behar duela Areta ez dela Laudioko herrigunea eta zenbait kilometrotara dagoela ikastetxerik hurbilena.
Idazkiak
Aretako Ikastetxea jadanik lanean ari da erabakiaren kontrako idazkia bidaltzeko Jokin Bildarratz Sailburuari, Aintzane Arrese Arabako arduradunari eta Eugenio Jimenez zentroen eta planifikazioaren zuzendariari. Gauza bera egingo dute familiek.
Idazkiak prestatu ez ezik, sinadura bilketa ere abiatuko du Guraso Elkarteak.
Horrez gain, Guraso Elkarteak sinadura bilketa abiatuko du egoera salatzeko eta eskualdeko gainerako ikastetxe publikoen babesa ere bilatuko dute.
Horrez gain, bestelako elkartasun keinuak ari dira erakartzen, Yogurinha Borova artistarena kasu, eta Laudioko Udaleko ordezkari politikoei ere eskatu diete bilera.
Honakoa ez da Aiaraldea jazotzen den mota honetako lehen gatazka. 2021ean Amurrioko mobilizazio jendetsuak egin zituzten Zabaleko Ikastetxearen itxieraren aurka eta, momentuz, zentroa irekita mantentzea lortu dute. Mendiko Eskolako Guraso Elkartea, bere aldetik, hainbat elkarretaratze egin zituen iaz, eskolako lerro bat desagerraraziko zutela salatzeko.