Pili Carrillo Markez tabernariak jubilatu arte jarraitu ahalko du Laudioko Batzalarrin kaleko Ilargi taberna kudeatzen. Hala ebatzi du Espainiako Auzitegi Gorenak aste honetan plazaratutako epaian.
Modu horretan, amaitu egin da taberna horren bueltan abiatutako prozesu judizial luzea. Carrillok berak oroitu duenez, duela hamar urte inguru iritsi zitzaion lehen kaleratze gutuna, lokalaren jabeen eskutik. Tabernariak uko egin zion joateari, eta orduan hasi ziren epaiketak. Amurrioko epaitegiak arrazoia eman zion Carrillo Markezi, baina jabeek helegitea jarri zuten Gasteizko Probintzia Auzitegian, eta honek arrazoia eman zien eurei. Modu horretan amaitu du gatazkak Espainiko Auzitegi Gorenean.
Auzitegi gorenaren aburuz, Arabako Epaitegi Probintzialak eginiko interpretazioa "jurisprudentzia-doktrinaren aurkakoa" da eta Amurrioko epaitegiak bere unean emandako epaia da zuzena. Horrez gain, prozesu judizialaren gastuak ordaintzera derrigortuko dituzte lokalaren jabeak. Tabernariak, aldiz, ez du helegitearen gasturik hartu beharko bere gain.
Carrillo pozik azaldu da, eta nabarmendu du epaiak balioko duela antzeko egoera bizi duten taberna batzuen egoera argitzeko. Errenten gorakadak eta alokairu-kontratu zahar eta berrien arteko tira-birak daude gatazkaren muinean. Boyer Legean dago auziaren funtsa. Miguel Boyer ministroak garatu zuen lege hori, 1985. urtean. Ordura arte, alokairuen kontratuek ez zuten iraunaldi finkorik. Ilargiko alokairu kontratua 1981. urtekoa da, eta horregatik ebatzi du Auzitegi Gorenak Carrillok jubilatu arte egon ahalko duela bertan, funtsean.
Kasu gehiago herrian
Gogoratu beharra dago Laudion bertan egon direla antzeko egoeran zeuden beste establezimendu batzuk, ez direnak Auzitegi Goreneraino iritsi eta itxita amaitu dutenak, La Viña edota Blanco, kasu.