Bel Pozueta Nafarroako EH Bilduko diputatu eta Altsasuko kasuan atxilotutako Adur Ramirez de Aldaren amak mezua helarazi dio Kepa Barañanori oparia jaso dutela eta “oso eskertuta” daudela adierazteko.
Pozuetak jakinarazi dio duela hilabete batzuk memoriaren inguruko proiektu bat abiatu zutela. Enpresa baten laguntzarekin, Altsasuko auziaren inguruan sortutako informazio eta material guztia sailkatzen ari dira, webgune batean bildu eta etorkizunean ondo jakin dadin “Altsasuko gazteekin zer gertatu zen, Altsasuko auziak Euskal Herriko historian zer suposatu zuen”. Hain zuzen, Barañanoren ekarpena proiektu horretara bideratuko dutela adierazi du Pozuetak.
Etekinak Altsasuko auziaren memoriaren inguruko proiektu batera bideratuko dituzte.
Kepa Barañanok 2019an eman zuen argitara Hi eta ni adiskide beti eleberria. Berak editatu eta publikatu zuen eta ezagun eta lagunen bitartez agin zuen zabalpena. Laster sarean zabalduko duela adierazi du, “nahi duenak irakur dezan”.
Benetan jazotako hainbat gertaera oinarri hartuta, Laudion girotu zuen fikziozko nobela. Helburu bikoitza zuela adierazi zuen orduan. Batetik, "Euskal Herriko historiaren kontakizunaren borroka irabaztea"; eta, bestetik, "euskarari prestigioa ematea".
Horrez gain, etekin guztiak Altsasuko auziaren alde emango zituela adierazi zuen. Horretarako, Bel Pozueta Nafarroako EH Bilduren diputatuarekin jarri zen harremanetan Madrilen EH Bilduren laguntzaile teknikoa den Iñigo Martinez laudioarraren bitartez.
Idazle, itzultzaile eta eskultore
Kepa Barañano laudioarra idazle, itzultzaile eta eskultore sutsua da. 2013an On Kixote Mantxako sareratu zuen Eneko Iñarrondoko ezizenarekin, Miguel de Cervantesen Don Quijote de la Mancha eleberriaren euskarazko bigarren itzulpen osoa. Euskarazko ortografia zaharrean itzuli zuen, eta sarean dago edonoren eskuragarri Zuzeu atarian.
Aiaraldea Komunikabidean maiz argitaratzen ditu iritzi artikuluak eta Faktoriaren lehenengo urteurrenerako harrizko eskultura bat egin zuen, besteak beste.