Aiala Vidrio enpresako langileek 32 orduko bi greba egun aurreikusi dituzte, konpainiako zuzendaritzari exijitzeko bermatu dezan Laudioko lantegiaren jarraikortasuna. Bihar eta ekainaren 13an egingo dituzte lanuzteak eta enpresa batzordeak elkarretaratze jendetsuak deitu ditu 05:30etik 09:30ak arte. Berez, lanuztea bihar gauean hasiko da eta asteazkenean luzatu.
Sindikatuen aburuz, arrazoiak soberan daude mobilizatzeko. Izan ere, enpresak 90 langile gutxiagorekin funtzionatzeko plan soziala abiatuko du, eta ez du bermerik eman lantegiko etorkizunari begira. Horregatik, langileek exijituko diote enpresari inbertsio plana prestatu dezan. Aintzat hartu beharra dago Aiala Vidriok hainbat inbertsio eta erosketa egin dituela atzerrian -Brasilen edota Portugalen-, Laudion lan kopurua murriztu nahi duen bitartean.
Horrez gain, eta plan sozialari lotuta, enpresa batzordeak epaitegira eraman du lanpostuen balorazioa, salatuta zuzendaritzak plan soziala baliatzen duela aitzakia moduan txanda kontratuak ez egiteko. Azkenik, sindikatuek exijitu diote enpresari segurtasun eta osasun neurriak har ditzan.
Lehen bi mobilizazioak
Enpresa batzordeko kide batek aurreratu dio Aiaraldea Komunikabideari deitutako bi greba egunek jarraipena izango dutela eta ez dutela galdu nahi tentsioa lantegiko jarraikortasuna ziurtatu arte.