Kirolaren gaiari heldu zioten Orbeko Etxean larunbatean, baina ezohiko begirada batetik. "Ertzetako bizipenak" izan zituzten hizpide, jendarteko hainbat zapalkuntza kirolean nola hezurmamitzen diren jorratzeko.
Goizeko hamaiketan hasi zen egitaraua, "emakume eta identitate disidenteei" bideratutako topaketa ez-mistoarekin. Gardeako baserri okupatuko ganbaran dagoen rokodromoa ireki zuten lehenbizi. Handik gutxira egin zuten lehen dinamika, Ainhoa Garciak gidatuta, etxearen kanpoko lorategian. "Gorputz eta bizipen disidenteak" izan zituzten hizpide, eskaladaren esparruan zentratuta. Ondoren, Light dokumentala proiektatu zuten, eta bazkaria egin zuten jarraian.
Arratsaldean, aldiz, Itxi Guerrak hartu zuen hitza. Lucha contra el capacitismo, anarquismo y capacitismo liburuaren egileak kapazitismoaren sarrera orokor bat egin zuen lehenbizi, eta zapalkuntza hori kirolean nola islatzen den jorratu zuen jarraian, bere bizipen pertsonaletatik abiatuta.
Gehiago Edicions zigiluak antolatu zuen larunbateko topaketa, Orbeko Etxeko kideekin elkarlanean. Maria Francisca Mas Rierak sortu zuen argitaletxe hori, bere lagun batekin. Escalantes liburua plazaratu zuen Masek 2021ean, eskaladaren munduan begirada feministatik lantzeko, eta 2022ko maiatzean aurkeztu zuen lan hori Orbeko Etxean, larunbat honetakoaren antzeko beste jardunaldi batean.
Argazkiak: Orbeko Etxea