Latiorro Eskolak bere 50. urteurrena ospatu du, baina efemerideak piztutako sua ez da guztiz itzali. Izan ere, hezkuntza zentroko zuzendaritzak antolatutako egitarauarekin batera, irakasle ohi talde batek erakusketa prestatu zuen Kultura Etxean.
Egitasmo biek material grafiko ugari sortu dute eta ikastetxeak partekatu du. Alde batetik, Kultura Etxean hainbat argazki ikusteko aukera izan ez ezik, jasotako ehunka argazkirekin bideoa ere ekoiztu zuten. Ikus-entzunezko piezan ikasle ohien argazkiak ikus daitezke, baita Latiorro Eskolako eraikinen obren irudiak ere.
Izan ere, erakusketa prestatzeko uste baino argazki gehiago jaso zituzten eta guztiak ez zirenez sartzen, bideoa baliatu zuten ekarpen guztiak bideratzeko, eta hemen dago ikusgai. Antolatzaileak oso pozik daude emaitzarekin eta, jasotako iritzien arabera, Kultura Etxeak inoiz hartutako erakusketa arrakastatsuenen artean egon da.
Horrez gain, 50. urteurreneko jai nagusia maiatzaren 20an ospatu zuten ikastetxean eta auzoan eta jasotako argazki eta bideo guztiak Internet bidez partekatu ditu eskolako zuzendaritzak. Hemen ikus eta deskargatu daitezke.