Ostera ere mobilizatzeari ekin diote Autoglas-Glavistako langileek. Izan ere, Enpresa Batzordearen aburuz, segur aski irailean ebatziko da fabrika irekita mantenduko den ala ez.
Iragan astean egin zuten ikasturteko lehen elkarretaratzea Laudioko Herriko plazan; eta astelehenenean toki berera itzuli ziren, pentsiodunekin batera mobilizatzeko. Protesta-dinamika horri eutsiko diote hilabete osoan zehar. Ostegunero mobilizatuko dira Laudioko Herriko plazan, 12:00etatik 13:00etara.
Ostegunero mobilizatuko dira Laudioko Herriko plazan, 12:00etatik 13:00etara
Baina, ez dira herrian geratuko. Eusko Jaurlaritzan hitza hartzen saiatuko dira, euren egoera "are gehiago sozializatzeko". Gainera, bidaia antolatu nahi dute Tuterara, bertan dagoen Guardianen lantegiaren aurrean protesta egiteko. Horrez gain, bileretan ere murgildu nahi dute langileen ordezkariek, gatazkan inplikatutako erakunde guztiekin -konkurtso-administratzaileak, Eusko Jaurlaritza eta Laudioko Udala, besteak beste-.
Produktu eta lehengaien likidazio plana
Enpresaren egoerari buruzko azken albisteak ere partekatu ditu ELAko sail sindikalak bere afiliatuei bidalitako oharrean. Sindikatuak jakinarazi duenez, hartzekodunen aurrelehiaketako administratzaileak likidazio plan bat garatu du fabrikan pilatuta dauden haizetakoak saldu eta, modu horretan, zorrak edota langileei zor zaizkien nominetako batzuk ordaindu ahal izateko. "Badirudi, aurrerago, biltegiratutako beira laua ere saltzea planteatzen dela, denboraren poderioz hondatu baino lehen".