Laudioko udal langileek ere egin dute bat Euskalgintzaren Kontseiluak biharko deitutako mobilizazioarekin

Txabi Alvarado Bañares 2023ko azaroaren 3a
Deskargatu Info Ahotsak :

Herriko plazan egin zuten elkarretaratzea eta argazkia atzo. / Aimar Gutierrez Bidarte

Modu horretan, euskararen normalizazioaren aurka egondako epai judizialak salatu dituzte, Laudioko Udalak berak iaz pairatutakoa kasu. 

Laudioko Udaleko dozenaka langile bildu ziren atzo goizean Herriko plazan eginiko elkarretaratzean. Modu horretan, atxikimendua eman nahi izan zioten Euskalgintzaren Kontseiluak bihar Bilbon deitutako mobilizazio nazionalari.

"Euskararen aurkako oldarraldiari" aurre egitea izango da biharko deialdiaren xede nagusia, antolatzaileek zehaztu dutenez. Horri lotuta, aipatu behar da Laudioko Udala izan dela euskararen normalizaziorako politiken aurkako ebazpen judiziala jaso duen erakundeetako bat.

Hain zuzen, epaile batek hizkuntza eskakizuna betetzen ez zuen langile bat berriz kontratatzera derrigortu zuen iaz tokiko erakundea, "euskara ikasteko zaila den hizkuntza" dela argudiatuta, besteak beste. 

17:00etan abiatuko da biharko mobilizazioa, Bilboko Bihotz Sakratutik. Laudioko Udaleko langileez gain, Aiaraldea Kooperatiba Elkarteko kideek ere egin dute bat deialdiarekin, eta trenetan hitzorduak zabaldu dituzte Bilbora joateko.

Euskara Laudio

LAGUN AGURGARRIA:

Bisitatzen ari zaren webgune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide