Kontzertu bikoitza ikusteko aukera egongo da larunbat honetan Faktorian. Matx artista laudioarra eta Ibil Bedi banda nafarra igoko dira eszenatokira 21:00etatik aurrera.
Malen Atxa hastapenetara itzuliko da larunbatean, Faktoriara, hain zuzen. Izan ere, bertan eskaini zuen bere lehenengo kontzertua 2021ean. Ez da bakarrik igoko taulara, azkenaldiko eredu berdinari eutsiz, Cuatro Bancoseko lagunak izango baititu inguruan.
Atxarekin batera, Ibil bedi taldea ere izango da Faktorian. Nafarrek 2018an ekin zioten bideari eta honezkero hiru lan luze plazaratu dituzte, azkena aurten bertan; Goldea. Matxek bezala, Ibil Bedik ere lotura estua du Faktoriarekin. 2019an egon ziren lehenengo aldiz, egun Faktoria dena pabiloi huts bat zen garaian. 2021ean, pandemia betean, errepikatu egin zuten. Faktoriako talde kuttunaren hirugarren bisita izango da oraingoa.
Sarrera bikoitz baten zozketa
Aiaraldea Komunikabideak kontzertuaz gozatzeko sarrera bikoitza zozkatuko du irakurle guztien artean. Zozketan parte hartzeko hemen eman daiteke izena, azaroaren 17ko 12:00ak baino lehenago.