Jendez gainezka egin dute Laudioko Osasun Zentroaren inguruek. Ehunka lagun batu dira bertan, ELA, LAB, CCOO eta ESK sindikatuek deituta, asteburuan gertatutako heriotza salatzeko. Urtarrilaren 12an David Hernandez 42 urteko laudioarra zendu zen anbulatorioan, bihotzekoak jota, une horretan Osasun Zentroan medikurik ez zegoela.
Gertatutakoak agerian utzi du, sindikatuen aburuz, Osakidetzak azken urteetan pairatu dituen "murrizketa eta desmantelazio" prozesua. Hain zuzen ere Osasun sistema publikoaren gaur egungo kudeaketak "herritarren bizitzak arriskuan" jartzen dituela aldarrikatu nahi izan dute gaurko mobilizazio jendetsuan.
Etengabeko Arreta Guneetan mediku baten presentzia egotea derrigorrezkoa dela azpimarratu dute sindikatuek. Salatu dutenez mediku falta hori bereziki nabaria eta larria da Aiaraldea kokatuta dagoen OSI Barrualden. Hori gutxi balitz Euskal Herriko beste hainbat eskualdetako Etengabeko Arreta Guneen itxiera ere salatu dute.
Manifestazioa ostiralean
JEZeko Enpresa Batzordeak lankidearen heriotza salatu nahi izan du ere. Gaur elkarretaratzen izan dira "Aski da!" zioen pankarta batekin, eta ostiralean manifestazioa deitu dute SOS Aiaraldea plataformarekin batera.
"Osasun sistema publiko eta duin baten alde" lemapean Laudioko Herriko Plazatik abiatuko da manifestazioa datorren urtarrilaren 19an, 18:30ean. JEZeko Enpresa Batzordetik herritar orori luzatu diote parte hartzeko deia.
