.jpg)
Antonio Oyarzabalen La muse oubliée II diskoak ez du asko itxaron behar izan kritika positiboak eta aitortza jasotzeko.
Pasa den astean sareratu ondoren streaming plataformetan, Isabel Coixet zinemagileak hizpide izan zuen igandean bere irratsaioan, Radio 3 katean.
Aste honetan, Classic FM irrati independente ingelesak 'Asteko aurkikuntza' izendatu du laudioarraren lana. Hedabide hori 1992an sortu zuten kapital pribatuarekin eta 4 milioi entzule baino gehiago ditu.
Modu batean, Classic FMren sorreraren atzean bazegoen BBC 3 irrati publikoarekin lehiatzeko asmoa, eta, hain zuzen, komunikabide publiko horren saio garrantzitsuenean (In tune izenekoa) ere elkarrizketatuko dute zuzenean laudioarra martxoaren 6an.
Izan ere, hurrengo egunean Witmore Hall areto ospetsuan eskainiko du emanaldia Oyarzabalek.
La muse oubliée II
Antonio Oyarzabalen bosgarren diskoa da La muse oubliée II. Lan horrek aurrekoaren ildo bera jarraitzen du eta 18 emakume konpositoreren piezak berreskuratu ditu. Kasu batzuetan historian lehenengo aldiz grabatu ditu.
Nadia Boulanger, Cecilia Chaminade, Florence Price, Ljubica Máric... hainbat garai eta tokitakoak izanda ere, ezaugarri bera dute denek: emakumezkoak izateagatik ez zutela aitortzarik izan. Oyarzabalek azaldu du motibazioa topatzen duela emakume hauen bizitzetan eta lanean ikertzen, musikaren historiografiak baztertu baititu. La muse oublieé II-k aurreko lanaren bidea hartu du eta aipatzekoa da lehenengo parteak oso kritika onak jaso zituela. Jadanik entzungai dago hainbat plataforma digitaletan eta IBS Classical disketxe ospetsuak CD euskarrian argitaratuko du laster.