Udara arte luzatuko da Autoglas-Glavistako itxieraren prozedura judiziala, gutxienez. Datorren martxoaren 19rako zegoen deituta Guardianek auzi honetan duen erantzukizuna ebazteko epaiketa, baina ekainaren 18ra atzeratu berri dute, hainbat pertsona eta enpresari oraindik ez dietelako auzira bertaratzeko eskaera bidali.
Hala jakinarazi du ELAko sail sindikalak bere afiliatuei bidalitako ohar baten bidez. Sindikatu horrek zehaztu duenez, ondorengo enpresa eta norbanako hauei iritsi behar zaie oraindik epaiketan agertzeko deia:
- Autoglas Holding BM S.L.
- Blue Motion Technologies Holding AG
- Parter Capital Group AG
- Rudiger Gunter Terhorst
- Joachim Magim
Epaiketaren atzerapenaz gain, beste gauza bat ere jakinarazi du epaileak gaur: atzera bota du Guardian enpresak aurkeztutako inpugnazioa eta, modu horretan, ateak ireki dizkio multinazionalak duen erantzukizuna ekainean egingo den epaiketan erabakitzeari.
Enplegua Erregulatzeko Espedientearen kontsulta-epea ere dago etenda, ELAk aipatu duenez. Horrez gain, sindikatuaren aburuz, hartzekodunen lehiaketako administratzaileak “datozen egunetan” aurkeztu beharko du Autoglas-Glavistan egun indarrean dagoen Enplegua Aldi Baterako Erregulatzeko Espedientearen luzapena, langileek euren soldataren zati bat jasotzen jarraitu dezaten, “prozesua amaitu arte”.
