Ezohiko irudia ikusi zuten atzo inguruko enpresetako beharginek Glavistan. Izan ere, goizean Ertzaintzaren brigada mugikorreko zortzi furgoneta eta bi auto agertu ziren itxita jarraitzen duen lantegian. Bitarteko horien arrazoia zen enpresa batek hara jo zuela alokairuan zituen orga jasotzaileak eramatera.
Glavistako langileen ordezkariek azaldu dute poliziaren presentziak ez zuela zentzurik: "Izan ere, orga horiek ez dira lehenago atera Guardianek ez zuelako baimenik ematen. Makinen jabeek epailearen laguntza eskatu behar izan zuten eta azkenean Guardianek utzi dio bere orgak eramatea".
Iturri sindikalek, bide batez, ukatu nahi izan dute ekoizpen makinak eraman behar dituztenik, Vocento taldeko egunkari batek adierazi duen moduan: "Enpresa hartzekodunen lehiaketan dago. Hortaz, makinak salgai daude aspaldi. Kontua da administrariarekin adostu genuela ez eramateko gure kontratuak bertan behera geratu arte".
Gogoratu beharra dago enpresa desagertzeko prozesua atzera bueltarik gabeko bidean sartu dela, fabrika erostean interesa zuen inbertsoreak atzera egin ostean. Hala ere, prozedura nabarmen luzatuko da, epaiketa ekainaren 18an izango baita. Epaileek Guardianen parte hartzea exijitu dute eta iruzurra gertatu den argitu nahi dute sindikatuek.