"Kezka eta haserrea" adierazi ditu Laudioko EAJk Lezeaga Aretoaren kudeaketarako Udalak eginiko kontratazioa dela eta. Ander Añibarroren aburuz, "pribatizazio eta nepotismo" praktikak egon dira prozedura horretan, kanpoko enpresa bat kontratatu delako espazio hori dinamizatzeko, "udal baliabideak aprobetxatu eta dauden lan-zerrenda edo -poltsa batetik berdintasun-teknikari kualifikatuak hautatu beharrean".
Horrez gain, bozeramaile jeltzaleak nabarmendu du aretoaren kudeaketa daraman enpresak Amurrioko EH Bilduko zinegotzia izandako pertsona bat kontratatu duela aretoko kudeatzaile lanak egiteko. Añibarrok uste du "entxufismoaren, laguntasunaren eta klientelismoaren susmoak" elikatzen dituela horrek, eta gaineratu du horiek direla EH Bildu Laudion praktikan jartzen ari den kudeaketa ereduaren ezaugarriak, "OMNIAren konnibentziarekin".
Hala argudiatu du EAJko zinegotziak: "Zergatik ez da deialdi publikorik egin baldintzak betetzen dituen edonork izena emateko eta, merezimendu objektiboetan oinarrituta, lanpostua lortzeko aukera izango duen lan-poltsa bat sortzeko? Zergatik uzten da kontratazioa sektore publikoaren gardentasun- eta meritokrazia-baldintzak betetzera behartuta ez dagoen enpresa baten esku? Bakoitzak atera ditzala bere ondorioak".
Gauzak hala, "kudeaketa-eredu garden eta etiko bat" praktikan jartzea exijitu diote jeltzaleek Laudioko Udal Gobernuari.
Udalak azaldu du lau enpresari eskatu zizkietela Lezeaga Aretoko arratsaldeko zerbitzua kudeatzeko eskaintzak, eta horietako bat hautatu zutela "lau hilabeteko esperientzia pilotu bat abian jartzeko.
Udalaren erantzuna
Udalak oharra plazaratu du gaur bertan, gaiari buruzko azalpenak emateko. Tokiko erakundeak azaldu du Lezeaga Aretoko arreta zerbitzua arratsaldez emateko erabaki zutela "lau hilabeteko esperientzia pilotu bat" abian jartzea, espazioa dinamizatzeaz arduratuko zen enpresa bat kontratatuz.
Oharrean zehaztu dutenez, lau enpresa gonbidatu zituzten parte hartzera, eta horietako bat hautatu zuten. Horren ostean iritsi ziren hurrengo urratsak: "Kontratatutako enpresak langileak hautatzeko prozesu bat garatu zuen, eta Udalaren eta Lanbideren ohiko komunikazio kanalen bitartez eman zen horren berri. Horrez gain, martxoaren 8ko Tokiko Gobernu Batzordean, Gobernu Taldeak langile berriak hautatzeko prozesua partekatu zuen. Eta kontratazioaren emaitza martxoaren 21ean egindako Zeharkako Politiken Batzordean jakinarazi zen".
Gauzak hala, Udal Gobernuko kideek ziurtatu dute "gardentasunaren eta objektibotasunaren alde" egingo dutela kontratazio prozesu guztietan, "bai zuzeneko kontratazioetan, bai Udalari zerbitzua ematen dioten enpresek egindakoetan".
