Thaylor Lubanzadiok kirol denboraldia amaitu berri du Maltan, Gzira United klubean, eta Laudiora itzuliko da orain. Oporraldian hautatu beharko du non jokatuko duen etorkizunean eta, antza, aukerak ez zaizkio faltako. Hala azaldu dio Aiaraldea Komunikabideari: "Ligako bi klub onenen eskaintzak dauzkat, egun batzuk hartuko ditut lasai, etxean pixka bat gozatzeko eta gero erabakia hartzeko. Herrialdez aldatu eta liga eta herrialde berriak bizi nahi nituen, eta ikusiko dugu zein erabaki hartuko dudan".
Maltako puntako kluben interesa sortzeko partida onak egin ditu Lubanzadiok, Aiaraldea Komunikabideari azaldu dionez: "Nire aurreko klubean ez nuen nire postuan jokatu eta orain gustatzen zaidan tokian egitea gogoko izan dut. Hori zen nire helburua, berriro nire postuan jokatzea eta erasoko futbolean gozatzea".
Horri esker, denboraldi honetan sei gol egin ditu, eta beste lau banatu dizkie bere kideei. Pertsonalki jardun borobila izan duen arren, taldeak ez ditu modu kolektiboan ezarritako helburuak bete: "Europan sartu eta kopa irabaztea zen helburua eta ez dugu bete, finalerdietan kanporatu gintuzten".
Gogoratu beharra dago bukatu berri den denboraldia Lubanzadioren hirugarrena izan dela Maltako lehen mailako txapelketan, eta Hibernians klubean aritu dela aurretik, 2021-2022 liga irabaziz.
