Atzo ez zen medikurik egon Laudioko Etengabeko Arreta Gunean. Hala jakinarazi du ESK sindikatuak, eta anbulatorioko langileak ere jarri dira harremanetan Aiaraldea Komunikabidearekin, gauza bera salatzeko.
Atzoko gabezia hori ez da kasu isolatua izan. Maiatzaren 18an antzeko egoera jazo zen Amurrioko anbulatorioan, eta aurretik ere beste hainbat aldiz gertatu da aurten. Horrez gain, Osakidetzak iragarri du ordutegi eta zerbitzu murrizketa ezarriko duela udan eskualdeko hainbat zentrotan.
Horren aurrean, herritarren batzarra eratu zen otsailean, SOS Aiaraldea lemapean. Herritar talde horrek hainbat mobilizazio eta ekimen egin ditu azken hilabeteetan. Amurrioko anbulatorioan egin zuten orain arteko azkena, maiatzaren 23an. Bertan, "eskubide urraketa oro" salatu eta erreklamazioak jartzeko deia luzatu zuten, Osakidetzatik jasotako erantzunak birrintzearekin batera.
Datorren asterako, aldiz, mahaingurua antolatu dute. Ekainaren 14an izango da, ostirala, 19:30ean Laudioko Batzalarrin kalean. Eskualdeko zenbait medikuk, erizainek eta herritarrek hartuko dute hitza bertan, Aiaraldeko osasun zentroen egoerari buruz hausnartzeko:
