Apirilean topatu zituen Laudioko Udalak amiantozko zuntzak dituen fibrozementua Granja kiroldegiko igerilekuetako aldageletan. Bederatzi bankutan identifikatu zuten minerala lehenbizi, eta azterketa sakonago bat egin ostean, guztira 63 banku zirela jakinarazi zuten. Orduantxe itxi zituzten aldagelak, eta gainera, egurra baliatu zuten elementu horiek enkapsulatzeko eta zuntzak askatzea ekiditeko.
Orain, tokiko erakundeak oharra zabaldu du jakinarazteko datozen egunotan ekingo diotela bankuak kiroldegitik ateratzeari. Minerala kendu aurretik, ordea, lan-eremua babesteko “burbuila estankoak muntatuko dituztela” adierazi dute, nahiz eta kiroldegia itxita dagoen, arriskuak ekiditeko. Lan horiek hiruzpalau egunez luzatuko direla ere aurreikusi dute.
Era berean, Udalak gogorarazi du duela bi hilabete ere Granja kiroldegiko harmailetan zeuden bi bankuetatik kendu zuela amiantoa, eta orduan ere, “Osalanen aholkuei jarraituz, lehenengo urrats gisa eserlekuak kapsulatu zirela, behin betiko erretiratzea kontratatu bitartean.”