The life in the XXI Century Josu Vaquerizo zinemagile laudioarraren filmak bizirik jarraitzen du. 2022an zazpi sari jaso zituen, guztiak Ameriketako Estatu Batuetan, eta berriki beste albiste on bat heldu zaio handik.
Izan ere, Terror Tapes ekoiztetxeak pelikula hori eta beste lan batzuk bildu ditu VHS euskarrian. Irailaren 1ean merkaturatu zituzten kopiak eta katalogo bitxi baten barruan dago: Double Dragon, Kill Bill, Kids, Requien for a dream, Transformers...
Estatu Batuetan euskarri fisikoak itzuli dira, VHS zinten bildumazale talde handiak sortuz
Vaquerizok azaldu du eremu anglo-amerikarrean euskarri fisikoen itzulera gertatzen ari dela eta horrela sortu direla bildumazale talde nahiko handiak.
Lana eskuratzeko aukera
Edonola ere, aipatu beharra dago Estatu Batuetan ez dutela, Europan bezala, PAL sistema erabiltzen VHS euskarrian. Hortaz, zinta horiek ez dira erabilgarriak Euskal Herrian.
Hori dela medio, Vaquerizok eurak erabaki du produktu bera Atlantikoaren alde honetan argitaratzea.
Hain zuzen, pentsatzen ari da euskaraz edota gazteleraz azpititulatutako kopiak sortzea Party´s Over, bere disketxea, baliatuta.
Online ikusteko aukera
VHSrik ez duen jendeak, dena den, parada dauka Internet bidez ikusteko laudioarraren lanak. Horretarako honako webgunean izena eman beharra dago.
Ohikoan, Vaquerizoren pelikulak eta lanak ikusteko, inskripzioa egin eta ordaindu beharra dago: "Nik neuk ekoiztutako pelikulak dira eta gastu guztiak nire gain hartzen ditut. Hortaz, eskertzen dut interesa duenak ekarpena egitea, hurrengo proiektuak gauzatu ahal izateko".
Hala eta guztiz ere, Aiaraldeko herritarrei eskainiko die doan ikustea "Laudiokolagunak" kodea erabilita.
Webguneko bisitarientzako oharra ere zabaldu du: "Web orrialdea labirinto baten moduan diseinatuta dago. Topatuko duten lehen elementua The life in the XXI Century izango da, baina eduki gehiago daude eta aurkitzeko apropos nahasgarria den webgunean murgildu behar da ikuslea".
Egun Ingalaterran bizi da Vaquerizo. Han finkatu da, urte luzez Oslon bizi ondoren.