Musika elektronikoa da Laudioko Beat elkartearen ardatza. Duela hamar urte sortu zen taldea, eta hainbat jaialdi antolatu dituzte ordutik hona, baina ez dute euren jarduna musikara mugatu, ekimen solidarioak antolatzen ere aritu baitira.
Horrelako egitasmo bat da orain abian jarri dutena: jostailu zein liburu bilketa Gasteizko Santiago Ospitalearentzat. Aspalditik daramate antzeko ekimenak egiten, elkartea sortu baino lehenagotik.
"Orain dela hamarkada bat baino gehiago Julio (Beat elkarteko kideetako bat) hazi zen bere kabuz jostailuak biltzen Gurutzetako ospitalera eramateko, bere alabak denbora luzea igaro behar zuelako bertan eta ez zegoelako jostailurik", azaldu diote Aiaraldea Komunikabideari.
Elektronika jaialdi bat antolatzea izan zen hurrengo urratsa. Drumgorri aretoan egin zuten hori, eskualdeko DJekin, sarrera moduan jostailu bat eramatea eskatuta.
Handik urte batzuetara Miguel Ibarretxe (Maik Falls izen artistikoa duen Laudioko ekoizlea) Gasteizko Santiago Ospitalearekin jarri zen harremanetan, eta bertako arduradunek proposatu zioten jostailu eta liburuak biltzea dohaintzan emateko.
Hori da, hain zuzen, orain egitera doazena. Laudioko sei establezimendu jarri dituzte bilketa puntu gisa:
- Faktoria
- Ez&Bai denda
- Jana ileapaindegia
- Iñaki frutadenda
- Extremadura zentroa
- Arteginez zentroa
Zehaztu dutenez, datorren astelehenera arte (urtarrilak 13) dago dohaintzak egitea epea, euren asmoa delako hurrengo egunean eramatea ospitalera.