Aiaraldea Komunikabideak aurreratutako informazioa luze landu du Ertzaintzak gaur zabaldutako prentsa oharrean. Izan ere, ostiralean 34 urteko gizonezko bat atxilotu zuen poliziak Zumalakarregi etorbidean. Hasiera batean ertzainek azaldu zuten agente bat erasotzeagatik arrastatu zutela eta gero erantsi zuten drogak zituela.
Gaur azaldutakoagatik, epaileari bere lonja miatzeko baimena lortu eta gero, 560 gramo marihuana, 800 bat gramo haxix, 90 estasi pilula eta substantzia beraren beste kilo bat inguru izozkailuan topatu zituzten akusatuaren lonjan. Horrez gain, ia 10.000 euro eta nahasteko substantzia ere aurkitu zituzten.
Atxiloketa
Ostiralean eguerdian, dirudienez, ertzainek susmagarritzat jo zuten herritarra eta identifikatu eta gorputz-miaketa egin ondoren, bere gauzen artean estasi eta speed pilula batzuk aurkitu zizkioten, baita zalantzazko jatorria zuten 280 euro ere.
Gauzak horrela, agenteek baimena eskatu zioten bere lonjan sartzeko, eta, poliziaren arabera, gizonak bere kabuz aitortu zuen lokalean substantzia gehiago zituela. Segurtasun Sailak adierazi duenez, jarraian, ihes egiten saiatu zen eta lonjaren sarrailako giltzak lurrera bota zituen. Atzeman zutenean, agenteei eraso egin zien, eta agintaritzaren aurkako delituagatik atxilotu zuten.
Akusazio horri gehitu behar zaio drogen salmentari lotutakoa -osasun publikoaren kontrako delitua-. Ertzaintzak erantsi du ikertuak aurrekariak dituela jadanik.