Guardianek prentsa oharra plazaratu berri du berresteko bihar ekin nahi diola labea itzaltzeari eta horren gaineko azalpen gehiago emateko.
Multinazionalak adierazi du bere “kezka nagusia” labearen atzeko hormaren egoera dela. “Bertan, material erregogorraren goiko aldearen zati bat erori egin zen, eta eskuineko aldeko bloke gehienak nabarmen pitzatuta daude”, azaldu du enpresak, eta ziurtatu du orain arte ez duela horrelako kalterik ikusi beste lantegietan duen labeetako batean ere ez.
Horrez gain, gaineratu du “arrakala esanguratsua” dagoela “eztainuzko bainuaren sarrerako arkuaren blokean”.
Gauzak hala, betiere Guardianen arabera, Eusko Jaurlaritzak mahai gainean jarritako beroaldian egindako geldialdia aurrera eramanez gero, "oso litekeena da kontrolatzen zaila izango den beirazko ihesa gertatzea eta horrek labearen egituran ondorio aurreikusiezina izatea".
Horrek langileentzat segurtasun-arrisku handia dakarrela ziurtatu du enpresak.
Bihar hasiko dira itzalketa-lanak
Hortaz, hasierako asmoetan berretsi da Guardian, eta bihar hasiko dira labea itzaltzeko prozesuarekin. Oharrean azaldu dutenez, "prozesu kontrolatu bat da, eta labearen baldintza kritikoaren araberako irismen egokia du".
Gainera, "itzalketak segurtasun-neurri eta prebentzio-protokolo zorrotzenak" jarraituko dituela adierazi du multinazionalak, eta zentzu horretan, Osalanek eta Lan Ikuskaritzak hozte-prozesuari dagokion dokumentazioa eskura dutela jakinarazi du.
Era berean, Guardianek ohartarazi du "urtarrilaren 29an itzalketa-lanak saihesteko, eta labea beroaldian gelditzeko, edo egun horretatik aurrera lanean jarraitzeko edozein alderdi interesdunek aktiba dezakeen edozein maniobra legalek langileen segurtasuna arriskuan jarriko lukeela".
Langile Batzordeak atzo erabaki zuen elkarretaratzea egingo dutela bihar goizeko 7:00etatik 10:00ak arte, lanak oztopatzeko asmoz, eta greba mugagabeari ekingo diotela ostegunetik aurrera.
Eusko Jaurlaritzarekin bilera
Prentsari bidalitako oharrean, alderdi interesdun guztien kezkak ulertzen dituela eta kontuan hartuko dituela dio Guardianek, eta bide horretan, gaur bertan Eusko Jaurlaritzako ordezkari politikoekin bilduko dela azaldu du "Guardianen egoerari eta ekintza-planari buruzko xehetasunak emateko".
Langile Batzordea ere prozesu guztiaren jakinaren gainean dagoela ziurtatu du multinazionalak.