Bosgarren denboraldi baterako kontratua sinatu du Uxue Mendiak Elche CFrekin, bertako taldeko kapitaina izaten jarraitzeko.
27 urte ditu jokalari laudioarrak, eta ibilbide oparoa egin du futbolari gisa. Ugaon aritu zen zazpi urtez, Aurrera de Vitoriara igaro zen gero eta Alavesera egin zuen salto jarraian.
Emaitza esanguratsuak lortu zituen kirolari gazteak azken talde horretan, lehen mailara igotzea lortu baitzuen, eta omenaldia jaso zuen horregatik Laudioko Udalaren eta Altzarrate Kirol Elkartearen partez.
Urte berean pasa zen Elche CF taldera, eta bertan aritu da ordutik hona. Klubeko kideek nabarmendu dute jokalari beteranoenetako bat bilakatu dela, eta taldearen "mugarri garrantzitsuetan" hartu duela parte, 2023an bigarren mailara igota, besteak beste.
Mendiak zelaian izan duen errendimendua "eztabaidaezina" izan dela nabarmendu du Elche CFk. "Aireko jokoan sendo, bata bestearen kontra indartsu eta defentsa-antolaketan beti adi, Mendiak errespetua lortu du bai bere taldekideen bai teknikarien artean", nabarmendu dute klubeko arduradunek, "bere lidergoa, gainera, etengabea izan da urte hauetan, denboraldi bakoitzeko une garrantzitsuenetan gidari eta laguntzaile gisa jardunez".
Gauzak hala, "funtsezko piezatzat" jo dute laudioarraren iraupena ziurtatzea, etorkizunean eskuratu daitezkeen garaipenei begira.