Amurrioko eredua jarraituta, Laudiora iritsi da Masa Kritikoa. Hilabeteko azken ostegunetan herriko kaleak hartuko dituzte bizikletekin. Irailaren 25ean Lamuza plazatik abiatuko dute egitasmoa 20:00etan, eta hilabetero errepikatuko dute hitzordua.
Ez da protesta bat, ezta manifestazio bat ere ez. "Bat-bateko ekimena" da, sustatzaileen hitzetan. Masa Kritikoa 1992an jaio zen AEBko San Francisco hirian. Mugimendu espontaneo bezala sortu zen, eta horrela hedatu da mundu zabalean. Hilabetean behin munduko ehunka hiritan milaka txirrindulari batzen dira, elkarrekin pedalei eragin eta bizikletaren espazioa aldarrikatzeko.
Mugimendu globala 2021eko abenduan iritsi zen Amurriora, eta ordutik ez dute hilabete bakar batean ere hutsik egin. Hilabetero hilabetero jai-giroan eta musika lagun atera dira Amurrioko kale eta errepideak bizikleten espazio ere badirela aldarrikatzera.
Hain justu, iazko abenduan ospatu zuen Amurrioko Masa Kritikoak hirugarren urteurrena, eta egitasmoa eskualdeko gainerako herrietara zabaltzeko gonbita egiteko baliatu zuten eguna. Gonbita onartu dutela dirudi, eta ikasturte berriarekin batera bi izango dira mugimendu global honen hitzorduak Aiaraldean: hilabeteko lehen ostiraletan Amurrion eta hilabeteko azken ostegunetan Laudion.
