Bost norbanako zein entitate laudioarrek eginiko lana aitortuko dute Altzarrate Sarien X. edizioan. Datorren igandean egingo dute ekitaldia arratsaldeko seietan Laudioko Lamuza parkeko Kasinoan.
Izen bereko peñak antolatzen du sariketa, bere garaiko Villosa sarien lekukoa hartuta. Ekimenaren helburua da urtean zehar esparru batean edo bestean gailendu diren laudioarrak goraipatzea.
Altzarrate Peña CD Laudioren jarraitzaileek osatzen dutenez, sarietako bat klub horretan nabarmendu den pertsona bati ematen diote. Aurten Oscar Ruizek jasoko du aitortza hori, klubean egin duen ibilbideagatik.
Beste bi sari banatuko dituzte kirolaren esparruan. Laudioar Txirrindulari Elkarteak jasoko du horietako bat, bere historian zehar izanadako bilakaeragatik. Kirolari onenaren aitortza, aldiz, Uxue Palacios eskiatzaileari emango diote, esparru horretan aurten erdietsi dituen garaipenengatik.
Kulturaren esparruan Felix Mugurutzak jasoko du saria, tokiko historia sustatu eta balioan jartzeko eginiko lanagatik.
Bukatzeko, sari berezi bat emango diote Aretako Eskolako komunitateari, aurten 100 urte bete dituelako.
