Laudioko Udalak Adinekoentzako Jantoki Zerbitzua abian jartzeko urratsak egiten jarraitu nahi du eta horretarako, aurretiazko kontsulta-aldia irekita.
Berez, zerbitzua hasi baino lehen araudia osatu behar du tokiko erakundeak eta astelehenetik martxoaren 13ra arte egongo da indarrean epe hori. Tarte horretan herritarrek udal erregistroan egin ditzakete euren ekarpenak eta iradokizunak.
Gogoratu beharra dago zerbitzuak helburu anitzak dituela. Alde batetik elikadura orekatua eta osasuntsua eskaintzea, baina bereziki herriko adinekoen topagune soziala sortzea, non euren ongizatea bermatzeko esparrua egongo den eta bakardade egoeran egon daitezkeen herritarrak artatuko dituzten.
Sanrokezar elkartearen egoitza
Azken urtean zenbait aurrerapauso lortu dituzte jantokia ahalbidetzeko eta iaz bi mugarri ezarri zituzten. Alde batetik, proiektua Sanrokezar elkartearen egoitzan kokatzea. Erabakiak eztabaida sortu zuen udalbatzan eta Udalaren helburua da egungo anbulatorioan ematea zerbitzua, behin Latiorroko osasun azpiegitura berria irekitzen denean.
Horrez gain, urte amaieran lokal hori egokitzeko obrak esleitzeko prozesua egin zuen Udalak.