Beste behin ere laudioarren egutegian ondo markatutako data batekin egin du bat Korrikak: Dolumin Barikuarekin. Orduarekin ez du asmatu oraingoan, ordea, herriko plazako postuak huts-hutsik baitzeuden euskararen aldeko olatua bertara heldu denerako.
Ganadua eta artisau produktuen ordez, aldarrikapenak topatu ditu herri osoan zehar, izan Palestinaren aldekoak, greban dauden Maderas de Llodioko eta Tubos Reunidoseko langileekin elkartasunean edota errolda soziala ezarri dadin eskatzekoak.
Eskualdeko hainbat eta hainbat txokotan bezala, su artifizialek zein bengalek kutsu berezia eman diote ibilbideari. Bereziki nabarmena izan da hori milaka lagunek herriko plazari buelta emateko unea heldu denean, Kirikiño Aisialdi Taldeko, Orbeko Etxeko eta Txosna Batzordeko kideek eskualdean kale-egoeran bizi diren hainbat lagunekin batera lasterketaren buruan jarri direnean.
Aiaraldea Komunikabideko kideok bertatik egon gara zuzeneko emisioa egiten, eta gau osoan zehar haur, gazte zein helduak apurka-apurka joan dira biltzen, Zumalakarregi hiribidetik zetorren jende andanara batu diren arte. Iritsi den leku beretik egin du alde Korrikak, Aretatik, alegia. Ordu batzuk deskantsatu ostean, Dolumin Barikuaz gozatzera aterako dira gaur laudioarrak.