Lamuza Jauregiko birgaitzea bukatutzat jo du Arabako Foru Aldundia. 2025eko martxoaren 27an egin zuten erakin eraberrituen inaugurazioa, ekitaldi instituzionalean. Atzo, berriz, Laudioko kultur eragileen aurrean aurkeztu zuten bost urtez luzatu diren lanen emaitza.
Ordezkaritza politiko eta herritar zabalak bete zuen atzo Lamuza Parkeko Kristalen Aretoa, Ramiro Gonzalez Ahaldun Nagusiak eta Cristina Gonzalez diputatu nagusirodeak gidatutako ekitaldian.
Foru erakundeak 5,5 milioi euroko inbertsioa egin du Lamuza Jauregiaren berreskurapenean, 9 milioi Lamuzako multzo historikoaren osotasunean. Inbertsioak "Aiaraldeko eraikin historiko enblematikoenetako bat berreskuratzeko eskualdearen zerbitzura egongo den kultura, hezkuntza eta gizarte gune ireki gisa itzultzeko balio izan du", Gonzalezen hitzetan. Orain, erakina ekintzaz betetzea da erronka.
Aiaraldearen etorkizuna mintzagai
Ramiro Gonzalezek ez zion iskin egin eskualdeak bizi duen egoera sozio-ekonomikoaz hitz egiteari. Eskualdeak industria eraldaketan "zailtasunak" bizi dituela eta "ziurgabetasun ekonomikoa" nagusi dela azaldu zuen Gonzalezek, baina ziurtatu du “erakundeak eskualdeari laguntzen ari dira prozesu honetan”.
Eusko Jaurlaritzaren eta Arabako Foru Aldundiaren elkarlana balioan jarri nahi izan zuen Ahaldun Nagusiak. Horren adibide jarri zituen: Etorkik Murgan inauguratutako lantegi berria, Vidralak iragarritako 70 milioi eurotik gorako inbertsioa eta Guardianen azpiegiturari industria-jarraipena emateko ahalegina.
"Proiektu eta inbertsio gehiago" egongo direla iragarri zuen ere Gonzalezek. Bide horretan Aiaraldeko Industrializazio Mahairen eginkizunetan egin zuen azpimarra Ahaldun Nagusiak: “Aiaraldearen lehiakortasunaren aldeko itun handi baterantz aurrera egitea, elkarrizketa sozialean, erakundeen arteko lankidetzan eta eskualde osoaren inplikazioan oinarrituta, jarduera ekonomiko eta industriala mantendu eta erakartzeko”. “Aiaraldeak etorkizuna du, industria etorkizun handia du denok elkarlanean aritzen bagara”.
"Industria eta nortasuna"
Aiaraldearen etorkizun industriala eta kulturala elkar loturik daudela aldarrikatu zuen Ramiro Gonzalezek atzo arratsaldeko ekitaldian. "Eskualde bat biziberritzea ez da soilik industrialdeak eraikitzea edo inbertsio ekonomikoak erakartzea; ondarea babestea, espazio partekatuak indartzea eta memoria eta nortasun kolektiboaren parte diren elementuak zaintzea ere bada. Lamuza Jauregiak ideia zabalago bat ordezkatzen du: industria, enplegua eta aukerak izaten jarraitu nahi duen eskualde batena, baina baita nortasuna, memoria eta arima ematen dioten elementuak gorde nahi dituena ere”.