Libian egunak blokeatuta daramatzan Sumud Lurreko Konboia gaur gauean erasotua izan dela salatu dute. Sirteko aldirietan kokatutako kanpamentura heldu dira ezezagunak eta bertan zeuden ekintzaileen aurka oldartu dira: kanpin-denden kontra jo dute ibilgailuetan, jendea autobus eta autoetan indarrez sarrarazi dute eta lekua uztera behartu dituzte beste batzuk.
Partaide guztiek utzi dute kanpamentua dagoeneko, eta batzuek arreta medikoa behar dute.
Erasoaren atzean nor dagoen argi ez duten arren, Libiako mendebaldeko agintariekin lotutako indarrak direla helarazi diete Konboiko parte-hartzaileei.
Gertakarien ondorioz, ekintzaile bat ospitalera eraman dute buruan kolpea jaso duelako. Gainera, alde egin nahi ez zuten eta meskitan babestu diren 23 emakumeri gasa bota diete eta indarrez arrastaka atera dituzte. Jakinarazi dutenez, denek utzi dute kanpamentua dagoeneko, eta batzuek arreta medikoa behar dute.
Gazara laguntza humanitarioa helarazi nahi duen ekimenean parte hartzen ari da Haizea Urkixo laudioarra eta familiak Aiaraldea Komunikabideari jakinarazi dionez arriskutik kanpo dago bera, Tripolirako bidean Konboiko beste ekintzaile batzuekin batera. Hala ere, ezjakintasun handiko egoera da azken egunetan bizitzen ari direna.
Atzo saiatu zen Konboia Libiako ekialdeko muga zeharkatzen, baina indar militarrekin negoziatzera joandako hamar herritarrak atxilotu zituzten Libiako Indar Armatu Arabiarrek eta ekialdeko Libiako agintariek.