Iragan astean jakinarazi zuen Hezkuntza Sailak Laudio Goikoa, lehengo Gregorio Marañon, zentroa ixteko asmoa. Erakinaren egoera ikuskatu ostean Aintzane Arrese Hezkuntzako Arabako ordezkariak eman zien erabakiaren berri zentroko hezkuntza komunitateari, eraikinaren birgaitzeak bi milioi euroko inbertsioa eskatzen duela argudiatuta.
Horrenbestez, datorren ikasturtetik aurrera lekualdatu egin beharko dituzte Laudio Goikoan elkartzen diren Zereginen Ikaskuntzarako Gelako 18 ikasleak eta Estetika eta Pelukeriako Lanbide Heziketako zikloak.
Mobilizazioak
Erabakiak kezka eta haserrea sortu du Laudioko eta Aiaraldeko hezkuntza komunitatean, eta mobilizatzeari ekin diote. Astelehenean Laudioko Udal Osoko Bilkurara eraman zituzten aldarrikapenak. Gaur, aldiz, Laudioko Herriko Plazan egin dute elkarretaratzea.
Hezkuntza Sailaren asmoak zeintzuk diren ez jakiteak sortu du samina. Laudio Goikoko ikasleak Laudio Institutuan jarritako barrakoietan batzeko aukerari ezezko borobila adierazi diote gaurko elkarretaratzean. Alternatiba horren aurrean hezkuntza komunitateko kideek Laudio Institutuko masifikatuta dagoela salatu dute, bai eta eta ZIG gelako ikasleen beharrak aintzat hartzeko eskatu ere. Bide horretan, asteleheneko Udal Osoko Bilkuran ZIG gelako gurasoek sinatutako gutuna irakurri dute gaur ere Herriko Plazan.
"Ez dugu barrakoirik nahi! Hezkuntza komunitatearen beharrak kontuan izango dituen soluzioa nahi dugu! Benetako inbertsioa nahi dugu!" aldarrikatu dute gaurko mobilizazioan. Hezkuntza Publikoaren aldeko defentsan berretsi dira, eta mobilizatzeko deia luzatu diete Aiaraldeko gainerako bizilagunei.
Bihar dira biltzekoak Hezkuntza Sailarekin, eta ohartarazpena luzatu dute: "Aipatutako norabidean doazen soluzioak mahai gainean jarri ezean, borrokan jarraituko dugula argi utzi nahi dugu".