Txistu eta oihu artean iritsi da Imanol Pradales lehendakaria JEZ enpresaren mendeurren ekitaldira. Izan ere, Maderas de Llodioko grebalarien piketearen aurretik igaro behar izan da JEZera iristeko. Iragan asteazkenean gainditu zuten 250. greba eguna Maderas de Llodioko beharginek. Presentzia poliziala nabaria izan da goizeko lehen ordutik, eta kordoi-polizial handi baten atzetik egin du fabrikara sarrera lehendakariak.
Maderas de Llodioko langileak ez ezik, JEZ eta Tubos Reunidoseko beharginak ere izan dira protestan. Hain zuzen ere, LABek oharra kaleratu du Maderas de Llodioko langileei elkartasuna adierazteko. Gainera, gutuna igorri diote lehendakariari, Maderas de Llodioko lan-gatazkan erakundeen inplikazioa galdeginez.
"Uste dugu ekitaldi honek duen arreta politiko eta mediatikoak balio behar duela gatazka honi irtenbidea emateko premiaren berri emateko ere. Ezinbestekoa da gure eskualdean enplegua mantentzeko mekanismo guztiak aktibatzearen alde egitea, eta halako gatazken aurrean erantzukizun politikoak hartzea, langile klasea baztertu gabe", adierazi du LAB sindikatuak kaleratutako oharrean.
Lantegi barruan entzun ahal izan dira piketeko oihuak, zeinek inplikazioa eskatzen zioten Lehendakariari Maderas de Llodioko lan gatazkarekin amaitzeko.
Argazkiak: Naia Vallejo Torres
