Maderas de Llodio enpresaren jabe den Garnica taldeak hautsak harrotu ditu azken egunotan. Izan ere, El Confidencial hedabideak argitaratu zuen ostiralean Carlyle Group (enpresaren %70aren jabea den funtsa) saiatzen ari dela Garnica saltzen.
Hedabideak adierazi zuenez, konpainiak balioa galdu du azken urteetan eta Carlyle Groupen asmoa izango litzateke sektoreko beste talde batekin batzea eta fusio horren bidez galerak murriztea.
Garnicak ukatu du
Informazioa, dena den, guztiz ukatu du Garnicak. Errioxako komunikabide bati argitu zion enpresak Carlyle Group arrisku funtsaren estrategia konpainiak erosi eta saltzea dela, baina une honetan ez dela hori egiten ari.
Garnicako ordezkariek onartu dute egoera hobeak bizi izan dituela proiektuak, baina orain ekoizpen hazkunde puntu batean daudela erantsi dute.
Halaber, Garnicako bozeramaileek gezurtatu zuten Banco Santanderrek Carlyle Group sakatu izana erabaki hori hartzeko eta finantza erakundearekin harremana ona dela gehitu zuten.
Garnicako ordezkariek onartu dute egoera hobeak bizi izan dituela proiektuak, baina orain ekoizpen hazkunde puntu batean daudela erantsi dute.
Laudion Aldi Baterako Enplegu Espedientean jarraitzen dute
Hedabideetan polemika hori gertatzen den bitartean Laudion egoera ez da aldatu eta langileek jarraitzen dute enplegua murrizteko aldi baterako espedientean, nahiz eta Garnicak esan duen produkzio hazkunde une batean daudela.
Iturri sindikalek aipatu diote Aiaraldea Komunikabideari ez dutela mezu zuzenik jaso enpresaren aldetik eta hurrengo astean, ostegunean, Eusko Jaurlaritzarekin, Arabako Foru Aldundiarekin eta Garnicarekin izango duten bilera baliatuko dutela balizko salmenta horri buruz.
Gogoratu beharra dago duela urtebete baino gehiago greba mugagabera jo zutela Laudioko lantegiko beharginek eta uztailera arte ez zirela itzuli lanpostuetara.