Eusko Jaurlaritzak proposatutako 2027ko aurrekontuen zirriborroan 16,9 milioi euroko diru kopuru erreserbatuta dago Guardianen instalazioak erosteko eta egokitzapena egikaritzeko, Aiaraldeko Berehalako Esku-hartzearen Planaren barruan .
177.910 metro karratuko lantegien erosketa suposatuko lukeen operazioa, dena den, ez dago erakunde publikoen esku, gaur Ramiro Gonzalez Arabako Ahaldun Nagusiak ziurtatu duenez.
Gonzalezek azaldu du instituzioek ezin dutela argitu zein konpromiso hartu dituzten, diskrezioagatik, baina gaineratu du Aldundiak bete dituela jadanik bere gain hartutako ardurak.
Gauzak horrela, azpiegituren esku aldaketa enpresa pribatuen esku dago, negoziazioetan baitaude oraindik, eta horrek erabakiko du operazioa egikarituko den edo ez.
Erakunde publikoek duela urte eta erdi adierazi zuten egitasmoan inplikatzeko prestutasuna. Apirilean, aldiz, argitara atera zen VSF eta Gaviota konpainiek berrireki nahi zituztela Guardian eta Glavista, Javier Garcia Marquez enpresariarekin batera, baina akordioak zintzilik jarraitzen du une honetan.