Okondon, abuztuaren 21ean egingo duten gari jotzerako idiak eta garia herritik kanpo ekarri behar izan dituzte, eta horren harira, antolatzaileek diote ez dugula gure kultura galdu behar.
Horregatik gari jotzearen helburuetariko bata dute antzinako ofizioak berreskuratzea eta ezagutzera ematea. Izan ere, aspaldian Okondo laborantzaz bizi zen eta hori da ezagutzera eman nahi dutena.
Aspaldiko ofizioak galduta daudelako zertan oinarritzen ziren eta zer nolako lanak egiten ziren ezagutzera eman duen herritar talde baten ekimenez sortu da aurtengo gari jotzea.
Garia jotzeko behar dena
Gari jotzerako, gari larraina egiten da, 8-10 metro diametro ingurukoa, lastoa zein garia dena lurrean ondo zabaltzen da, eta zelaitik sorta batzuk ekartzen dira. Garia jotzeko eultzia sardeaz jasotzen da.
Horretarako idiek eta trailuak prest egon behar dute. Trailua harriez edota zerrez egindakoa izaten da, eta idiekin ez ezik, zaldiekin ere egin ahal da.
Herritarren parte hartze zabala
Herriko jendea dago buru belarri horretan lanean eta denon artean egiten ari dira. Jende ugari ari da inplikatzen eta asko eskertzen dute. Jai herrikoia egin nahi dute, eta dena ondo bidean, aurrerago bide horri eutsi nahi diote.
Egitaraua
Goizeko 08:00etatik aurrera ekingo diote lanari, eta hasteko Gari Jotzeak behar dituen prestaketa guztiak egingo dituzte.
Ondoren, 09:00etatik aurrera idien etorreraren zain egongo dira, jarraian gurdia kargatu, eta indarrak hartzeko hamaiketakoa jango dute bertan lanean ari diren herritarrek. Besteak beste, eultzia sardeaz jaso, idiak eta trailua prestatu beharko dituzte.
Bestalde, antolakuntzatik oharra zabaldu nahi dute, izan ere, igotzeko adin txikikoak lagunduta joan beharko dira eta gari jotze bera egunaren lehen zatian egingo dute, ondoren idiek atseden hartu eta festarekin jarraitu ahal izateko.
2000. urtean parte hartu eta zendu diren sei lagunak oroitzeko 13:00etan minutuko isilunea eta agurra egingo dute ekitaldi ofizialean.
Arratsaldean dena jaso, eta garia poltsetan sartuko dute, eta ondoren babesle, herritar eta lagunek eskainitako produktuak zozketatuko dituzte arratsaldeko sei eta erdiak inguru, eta bukatzeko sardina jana herrikoia egiteko asmoa dute.