Atzo udal osoko bilkura egin zuten Okondon eta oposizioak -EAJ eta EH Bildu- alkatearen dedikazioa erdira murriztu zuen. Ondorioz, Sergio Tatok jardunaldi erdia beteko du eta bere soldata % 50ean murriztuko da. 44.000 euro kobratu ordez 22.000 euro kobratuko ditu.
Alkatearen iritzia
Sergio Tato Okondo Aurrerako alkateak adierazi du bere dedikazioa eta soldata murrizteko erabakiaren bitartez udal gobernu taldeari min egitea bilatzen duela oposizioak. Tatoren ustez EAJko egoitzan hartutako neurria da eta Okondo Aurrera taldeari kalteak sortu ez ezik herritarrak ere kaltetuko ditu.
Alkatearen aburuz EAJk eta EH Bilduk ez dituzte onartu hauteskundeen emaitzak.
Sergio Tatok bereziki kritikatu du EH Bilduren jarrera; gaineratu du 1999. urtean erabaki zela alkateak dedikazio osoa izatea eta ezker abertzaleak babestu zuela neurria. Gainera, Okondo Aurrerako ordezkariak aipatu du EH Bilduk Laudion dedikazioak eta soldatak igo dituela.
EH Bilduko argudioak
Koalizioak azaldu du Sergio Tato EH Bildun zegoenean dedikazioaren eta soldaten kontua ere hainbat aldiz eztabaidatu zutela, baina orain Okondo Aurrera taldean dauden zinegotzien jarrerari esker ez zutela aldaketarik gauzatu.
EH Bilduk erantsi du tirabira horiek eragin zutela Sergio Tatok eta zenbait zinegotzik Okondo Aurrera sortzea. Zentzu horretan, EH Bilduk azpimarratu du Okondo Aurrerak bakarrik 4 bozei esker irabazi zituela hauteskundeak eta ez duela gehiengo osoa.
Batzordeak eta udalbatza
Oposizioak eta udal gobernu taldeak talka egin zuten beste esparru batzuetan ere. Okondo Aurrerak 14 batzorde proposatu zituen eta batzordeko lehendakariak 180 euro kobratzea. Baina azkenean 5 batzorde egongo dira eta lehendakariak zein gainontzeko zinegotziek 40 euro jasoko dituzte.
Bukatzeko udalbatza bakoitzeko 50 euro kobratuko dituzte arrunta bada eta 20 ez ohikoa izanez gero.
Gainera, udal osoko bilkurak 20:00etan egingo dituzte jendearen partaidetza errazteko.