Urriaren 14tik 16ra ospatuko dituzte Irabiengo jaiak

Irabiengo jaiak, artxibo irudi batean. / Aiaraldea.eus

18 ekintza egingo dituzte hiru egunetan Okondoko Irabien auzoan, bertako jaiak ospatzeko. 

Irabien auzoko jaiek badute egitaraua jada. Bilera irekia antolatu zuen udalak duela zenbait aste, programazioa adosteko; eta ekintza mordoa prestatu dituzte modu horretan. 

Hala, urriaren 14tik 16ra iraungo dute auzoko festek, ostiraletik igandera hain zuzen. Barikuan 19:00etan ekingo diote odoloste janari, eta 20:30ean umeentzako gaubela eskainiko du Okondo Begira ekimenak. 21:00etan, aldiz, mus txapelketa jokatuko dute. "Izen-emateak 20€ balio ditu, eta Batzokian egin beharko da", erantsi dute. 

Paella, patata tortila eta marmitako txapelketak egongo dira, besteak beste, Irabiengo jaietan. Horrez gain, mozorro lehiaketa eta karta joko ugari ere antolatu dituzte

Larunbatean pilatuko dira jarduera gehienak. Gastronomia lehiaketarekin abiatuko dute eguna: paella kozinatu beharko dute okondoarrek oraingoan, "ogia eta arroza eskainiko da". 12:30ean meza eta luntxa izango dira osagai nagusi, eta 13:00etan 'Florentxu eta bere lagunak' oholtzaratuko dira. 14:00etan ekingo diote paella janari, baina 13:30ean etxeko postreen erakusketa atonduko dute festa eremuan. 17:00etan, berriz, bingoarekin girotuko dute bazkalondoa. Arratsaldean, ordea, altxorraren bila jolasa antolatuko du Guraso Elkarteak (18:00etan). Ordu berean hasiko da tute txapelketa ere. Okondoko jaietan bezala, mozorro txapelketak hartuko du protagonismoa gauean; hots, 21:00etan. Azkenik, DJ bat ariko da musika jartzen, aurreratu dutenez.

Igandea mendira bidean zukutuko dute, 9:00etan Ganekogortaraino ibilaldia eginda. 11:30ean, baina, patata tortila eta marmitako txapelketak egongo dira, eta arratsaldean briska zein igel jaurtiketarenak. Modu horretan, 19:00etan bukatuko dituzte Irabiengo jaiak, zozketarekin. 

"Ekitaldi gastronomikoetan parte hartzeko eta jateko izena eman behar da Batzokian edo udaletxean, urriaren 11 baino lehen", nabarmendu dute. Hemen ikusi daiteke egitarau osoa:

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide