Kaitin Allende Zaldunbide kazetari, esatari, umoregile eta aurkezlea izango da aurtengo Okondoko jaietako pregoilaria. Bera hautatu dute okondoarrek, uztailean abiatutako parte hartze prozesuan. Berez, atzo agortu zen bozkatzeko epea eta gaur jakinarazi du Udalak.
Okondoarrak poztasunez eta ezustean hartu du albistea: "Harrituta geratu naiz. Izugarria da pregoia irakurtzea jaien hasieran, eta herriari eskertuko diot. Opari eder bat izan da, sorpresa polita".
Aiaraldea Komunikabideak galdetu dio pregoiaren edukiari buruz, baina Allendek ez du tarterik izan lantzeko: "Oraindik ez dut pentsatu zer kontatuko dudan. Elebiduna izango da, hori bai, jende orok ulertu dezan".
Alegia, Kaitin Allende Zaldunbide ez dago arduratuta pregoiaren edukiagatik, baizik eta horretarako izango duen denbora tarteagatik. "Nola egingo du bakarrizketak egiten dituen umoregile batek pregoia? Gaur hasi eta bihar amaitu dezaket. Argi daukat gauza asko kontatuko ditudala, baina ez dakit zenbat denbora emango didaten", aipatu dio Aiaraldea Komunikabideari irribartsu.