Politikagintza ez da Orozkoko Eusko Alderdi Jeltzaleko kideek gogoko duten gauza bakarra. Badute beste zaletasun bat ere: gastronomia. Horren adierazlea da San Antolinetan antolatzen duten Marmitako Lehiaketa.
Urteak dira lehiaketa hau antolatzen hasi zirela, aurtengoa XIII. edizioa izango da. Lehen Bakailao Txapelketa egiten zen. Zergatik pasa ziren, bada, marmitakora? “Euskal Herrian nahiko sustraituta dagoen platera delako”, azaldu du txapelketaren antolakuntzan aritzen den Jabi Barrondok, “jendeak atsegin du eta animatu egiten dira parte hartzera”.
Urteen poderioz geroz eta arrakasta gehiago hartzen joan den ekintza dela azpimarratu du Barrondok. “Lehen urteetan Orozkoko eta inguruko herrietako parte hartzaileak baino ez genituen”, azaldu du, “baina azkenaldian urrutiagotik ere hasi da jendea gerturatzen. Araba eta Bizkai osotik datoz parte hartzaileak, 40-50 kazola inguru aurkezten dira”.
Sari berezia aurten, herrikoentzat
Aurten ez da aurreko edizioekiko aldaketa nabarmenik egongo. Dagoen nobedade bakarra sarietan dago, aurten herriko kazola onenari sari berezi bat emango baitiote.
Horren zergatia azaldu du Barrondok: “Txapelketara maila altua duen kanpoko jende asko gerturatzen da. Horrela, herriko jende gaztea ere parte hartzera animatu nahi dugu”.