Pisu nabarmena izango du Alaitz Aramendik Txosnaguneko egitarauan. Sanantolinen bigarren egunean -irailak 1- 10 urte beteko dira atxilotu zutenetik. Gauzak hala, bere egoera salatzera bideratuak egongo dira aurtengo jaietako hainbat ekintza.
Aramendiren kasua izango dute hizpide Zapatu Morean, ekimen horren antolatzaileek aurreratu dutenez. “Alaitzen egoeratik abiatuta emakume guztiok pairatzen dugun zapalkuntza salatuko dugu”. Iaz egin zen Zapatu Morearen lehen edizioa, Matxintxu emakume elkartearen eta Gazte Asanbladaren arteko elkarlanari esker: “Espero baino arrakasta gehiago izan zuen, eta ildo horretan sakonduko dugu aurten”.
Irailaren 2an izango da zita, San Antolin Egunean. Kalejira egongo da lehenbizi, “Mamiki” batukadarekin. Kancaneo antzerki taldearen “Pa ti pa mi” lana ikusi ahal izango da gero, eta horren ostean egingo dute ekitaldia. Mafaldak eta Aneguriak emango diote amaiera egunari. “Aneguria emakumezko rap abeslaria da; eta Mafaldak, gizonezko taldekideak baditu ere, aldarri feminista ugari plazaratzen ditu”, azaldu dute antolatzaileek.
Elkartasun afaria
Hurrengo egunean -irailak 3- egingo dute elkartasun afaria Txosnagunean. Aramendiren aurkako epaia salatzea izango da ekimen horren xedea. Hilean Bariku Bat taldea izango da afalostea girotzearen arduraduna. 535 urteko kartzela zigorra ezarri zioten preso politiko orozkoarrari uztailean, ekintza armatua egotzita.